فاراداى

ساعتان من الملل الفيزيائى، أستاذ خنيق يطلع يرمى فى كلام بايخ نظرى، أمتى نخلص بقى، يطلع اللأستاذ يتكلم : 

ولادى ركزوا معايا، يمكن تتعلموا أنتم لسه صغيرين ولسه فى أمل فيكم أخدتم قبل كده أن الطاقة ممكن تحويلها من صورة لأخرى واخدتم أن مرور تيار كهربى فى سلك يكون مجال مغناطيسى، فهل ممكن من المجال المغناطيسى يتكون تيار كهربى ؟؟ 

سؤال عادى لكن فى مجتمعنا ملهوش أى معنى، الكهربا عندنا خطر مميت، كهربا يعنى جمجمة وعظمتان، كهربا يعنى نور، دا حتى لما الكهربا بتنقطع بنقول النور قطع. ولأن التفكير عيب عندنا الأستاذ مسمحش أن أحنا نقبّح فى وجوده وحرق السؤال بغير إكتراث للجريمة اللى ارتكبها فى حقنا وكمل كلامه وكأن شيئا لم يكن : 

عمك فاراداى كان قاعد فى المعمل بتاعه، جاب مغناطيس وملف سلك معزول مش لاصق فى بعضه، ووصله بجلفانومتر حساس الصفر بتاعه فى النصف، ومتقوليش جابه منين دا فارادى مش عم جمعه الكهربائى اللى عندكم . 

دلوقتى بس عرفت ليه عم جمعه كان مصمم أنه يبقى كهربائى،وأزاى نجح وبقى أكبر كهربائى فى شارعنا، وعرفت ليه اتخانق مع الزبون اللى قال له يا جماجيعو .. أصل عم جمعه كان ساقط انجليزى فى الثانوى الصناعى، وكان فاكر أن فاراداى يعنى جمعه بالإنجليزى، وده كان سبب إعتزازه باسمه، ف ازاى يقبل أنه يبقى جماجيعو أو فرفيروا بفرض أن فاراداى يعنى جمعه .. المهم كمل الأستاذ : 

ظبّط فاراداى العدة ومسك المغناطيس ودخله فى الملف وهو بيدخله هوب مؤشر الجلفانومتر لعب معاه، اتهبل عمك فاراداى قعد يدخل المغناطيس ويطلعه ويضحك، والجلفانومتر يلعب أكتر ويضحك، يقلب المغناطيس ويضحك، المؤشر يلعب على الجنبين ويطّوح زى المساطيل ويضحك، هوووووووب وفاراداى ميت على نفسه من الضحك يجى أبوه ويديله 100 قفا على سهوه .. 

- بتعمل أيه يا ابن العبيطة ؟! 

- بس متقولش عبيطة . 

عمك فاراداى بعد ما قفاه ورم قالك بس ياعم كفاية ضحك نشوف أكل عيشنا ، أديها حركة تديك كهربا، فى حركة فى تيار، ما فى حركة ؟؟ ما فى تيار .

معجبنيش كلام الأستاذ مع انه ضحكنى، ومسكت فى ودان الواد اللى جمبى

- تعرف أن من غير فاراداى اللى الأستاذ بيتكلم عليه كده مكناش هنقعد هنا أنا وأنت نسمع كلام الراجل الخرمان ده ؟؟ تعرف أن فاراداى ده الملكة فيكتوريا زارته فى معمله .. هى اللى راحت له بنفسها مش طلبته يجيلها .. تعرف أن الفوايد العلمية وإكتشافات فاراداى عددها أكبر من عدد السنين اللى عاشها الأستاذ ده ؟؟ فى حوار سألته الملكة عن فايدة اكتشافاته الغريبة قالها " ما فائدة طفل رضيع يا سيدتى ؟؟" وكان قصده أن يوم من الأيام الناس هتعرف قيمة الحاجات ديه .. تعرف أن فاراداى ده علم نفسه بنفسه مش أحنا اللى بنموت فى الدرس مع أننا بناخد دروس خصوصية ؟

تعرف أن عبث فاراداى المعملى وبعده شخبطة ماكسويل الرياضية اللى لقاها شكلها مش متظبط فحط حد إضافى سماه تيار الإزاحة على سبيل الإفتراض والكلام ده كله اللى دفع إينشتين أن يكتشف النسبية الخاصة .. وبعدها يجى ب 100 سنة تتقلب الدنيا، ثورة تغير ملامح الأرض أعمال فاراداى وماكسويل كان الدناميت اللى فجر الثورة ديه، كان سبب أن الكهربا تستخدم فى النور وكان سبب فى إختراع التليفون والراديو والتلفزيون و القطارات والأجهزة الطبية والكمبيوتر يعنى كمان فاراداى كان سبب فى الثورة اللى فى مصر دلوقتى .. 

يبصلى الأستاذ بعد ما كلامى لفت انتباه كام واحد من اللى جامبى بدأت أكل منه الجو، شغلانة تكسب دهب دا بيلهف مش أقل من 20 ألف جنيه فى الشهر من دمنا .. 

- يا أيها الحيوان اسكت .

واضح أن الأستاذ لسه معرفنيش، بيغلط لكن أنا عارف أتعامل مع الأشكال ديه أزاى ، أكتر مايغيظ الأستاذ وأى شخص أن يحس أنه ولا حاجه أنه ملهوش أى تأثير، وأنا مع ابتسامة باردة مستفزة بتفرد على الكرسى واستجم كأنى على البحر غير عابئ بوجوده، شايف الشر بيطأ من عنيه، كمل الشرح 

مقلناش اسم التجربة ، سألته قالى تجربة فاراداى ،ابتسمت نفس الإبتسامة الباردة المستفزة، عبيط ده ولا أيه ما فارداى عنده تجارب كتير. كلمت اللى جمبى عن تجربة فارادى اللى اخدناها فى الكميا السنة اللى فاتت وكلامى كان مبرر كويس أنه ينتقم منى .. 

- قوم يالا ... اطلع بره . 

بنفس الابتسامة الباردة المستفزة كان رد فعلى وأنا بلم كتبى بالتصوير البطيء وكان فى عين الأستاذ رغبة متوحشة فى رزعى 100 قفا على سهة زى اللى أخدهم فاراداى .. ممنعهوش إلا الطريق الوعر المكدس بالطلاب المغفلين و ع الباب حبيت أحيّه هو و فرافيروا بتاعه : 

ابقى سلملى على فاراداى ابن العبيطة . 

وأعدت أضحك واضحك . نفس الضحكة اللى ضحكها فاراداى 

- هع هع هع هع هع .. 

- تراااااااك تراااك تراااك ترااك ............. بالظبط 100 وعلى سهوة ...