(مقدمة ثورة)
عايزنى شاعر أكون !
عايزين كلام موزون !
هاتولى بحر يشيل عذابى
هاتولى قافية مُرصّعة بالنار
يا ناس يا عاقلة !
متصدقوش!
متصدقوش الشعر والشعرا
دول كدابين
ورا الستاير متخفّين
يبان حزين مهموم
على ايه يا عم حزين ؟
ع الشهرة والتصقيف ؟
ع المعجبين والمعجبات ؟
ولا ع البرامج والأمسيات ؟
تكنش فاكرنا مسطولين ؟
ولا أحنا عشان غلابة وتعبانين ؟
مغنواتى على الربا الضايعة منى
مهيش معايا لكنى برضه هغنى
اللحن أهه
سامعينوا ؟!
مش مهم
هو أنتم أمتى كنتوا بتسمعوا ؟
سامعوا أنا
بيصرخ ينوح
ويبوح بسره
يالحن
معاك كلمتى أهِه
شايفنها ؟!
مش مهم
هو أنتم أمتى كنتوا بتشوفوا ؟
مدبوحة كلمتى
والدم أبيض فوق تراب أسود سواد قلبى اللى من أقدامكو داب
مليان عذاب لكن هغنى
هغنى وهاقول آآآآه
هغنى غنوتى والحدوته هتعيش
فى المولد هغنى
فى الشارع هغنى
فى الحمام هغنى
هغنى قبل النوم
هغنى قبل الموت
مهما يحصل هغنى
(الآآآآه)
نزلت من بطن أمى بقول آه
ونازل بطن القبر أقول آه
ايه حكاية الآآه معايا ؟!
بقولها لكنى مش زعلان
مع أنى تعبان .
بقول آه فى قلب الحلم اللى خدنى وطار
بقول آه فى وسط معركة التراب والنار
أيه حكايتك يا آه معايا ؟
فى حضن حبيبتى
والسما اتعرت
وبقيت بلون الورد
الأرض متكسفة
وأنت من قلبى طالعة فى وسط الألتحام
وفى وسط الأندماج
حارقة لكن التلج بيجرى فى عروقك
ليه بتنقصينى ؟ ليه بتفكرينى ؟
أنى أنا إنسان ..
(حلم)
حلمت حلم كبير
لكنه مكنش كبير
كان زىّ صغير
لكنى برضه
مكنتش صغير
أنا كبير
أنا اللى كبّرت الحلم
حتى اسألوه
لما تلقوه
هيقولكم
أنى أنا اللى كبّرته
أنا اللى شربته نزيف أفكارى
أنا اللى سهرت أرسم ملامحه
أنا اللى شلته فى صغره
ولما كبر خدنى وطار
والكل غار
الكل ثار
أزاى يطير فى الهوا ؟!
هو فاكر نفسه ايه ولا ابن مين ؟!
هطّير ؟
طير
لكن ورينا هتجيب منين الهوا
سرقوا الهوا
لكن حلمى أكبر وأعلى من الهوا
طار فى الفضا
مسك النجوم
سحرته
سلبته إرادته
وفى سنين بعيدة حدفته
كانت الشمس لسه صبية
بيضة ونقية
فى عنيها نار الغيرة
غارت من النجمة البعيدة
خطفته من حضنها
حلمى صار فى الشمس
بيصارع الليل كل يوم
حاسينه ؟
مش مهم
هو أنتم أمتى كنتوا بتحسوا ؟!
أنا حاسه مهو حلمى
طلعت معاه لحد النجوم
سابنى وراح للشمس
لا أنا سابته
لا أنا مسبتوش
الشمس سرقته
والأرض خطفتنى
والكل غار
والكل ثار
أزاى يروح عند النجوم
هو فاكر نفسه ايه ولا ابن مين ؟
(النهاية)
قرب قرب قرب
لا تخاف ولا تستغرب
متكدبش عنيك
قلوب للبيع
قلوب بتدق
قلب صافية
قلوب بتحب
قلوب معدش ليها لازمة
افتح يا سيدى
قلب العبد لله
قلب صغير استعمال سنتين
بكيسه لكن من غير ضمان
حد شارى ؟!
مفيش ؟!
القلب وفوقه صاحبه ؟!
حد شارى؟!
القلب وفوقه صاحبه وحياته ؟!
حد شارى ؟!
- ده قلب مكسور ..
- يتصلح ، اسمعى كده يا هانم بيدق ..
- يفتح الله يا سيدى
- استنى بس يا هانم .. دا قلب أبيض مفيش منه .
- الله يسهلك .
- أنا مش بشحت يا هانم .. دا قلب بيحب نادر فى الزمن ده ..
- ابعد عن طريقى ..
- ذنب قلبى ايه ترميه فى التراب يا هانم ؟!
- قلبك معدش ينفع ، ملهوش غير التراب .
قرب قرب قرب
لا تخاف ولا تستغرب
متكدبش عنيك
احنا بتوع القلوب المتكسرة
دلوقتى بنكسر قلوب
احنا اللى بعنا قلوبنا
دلوقتى بنبيع فى القلوب
داير دايرتك يازمن
ما بين غالب وبين مغلوب
أنا كنت زمان عبيط
شايف الصورة بالمقلوب
دلوقتى
باغضب
واضرب
واكسر
وأقتل لو حكمت
مع أنى كنت زمان
أنا المغلوب وأنا المضروب
ع الرف كنت أنا المحطوط
ويرتها جت على كده
دول حطونى بالشئلوب
والرف كان مكسور
فى بيت كان مهجور
وكفاية كلام على كده
خلى الطابق مستور
لكن الصورة هعدلها
لو طلبت أحرق البيت هحرقه
مهو العيشة بالمقلوب
موت ..
وأنا مش هموت
أنا هغنى
فى وسط النار هغنى
تحت التراب هغنى
اقتلنى
هغنى
مصرى
26\1\2011
